Flug frá Leifsstöð í Keflavík, mæting þar a.m.k. tveimur og hálfri klst. fyrir brottför; millilent og síðan áfram flogið til Víetnams, lending þar er næsta dag að morgni að staðartíma sem er UTC + 7 h ("íslenskur tími" + 7 klst.).

Við komuna til Hanoi, menningarmiðstöðvar og höfuðborgar Víetnams, tekur íslenskur fararstjóri, Haukur Hauksson og fulltrúi víetnömsku ferðaskrif­stofunnar á móti hópnum á flugvellinum og farið verður í rútu á hótel Thien Thai hotel. Síðdegis förum við í hjóla- eða kerruferð um Gamlabæinn, eldforn öngstræti þar sem götusalar pranga og prútta eins og þeir hafa tíðkað frá örófi alda. Þá er haldið á miðbæjarmarkaðinn, þar sem fá má allskonar djásn og dýrgripi auk skrans. Afslöppun og gist í Hanoi.

Máltíð: Kvöldverður

Farið verður í heils dags skoðunarferð um Hanoi - höfuðborg Víetnams í næstum 1000 ár. Gefur að líta fögur breiðstræti jöðruð trjám, byggingar í frönskum nýlendustíl, friðsæl stöðuvötn og austurlensk hof. Árdegis sjáum Ho Chi Minh grafhýsið en hér liggur smurlingur stofnanda kommúnistaflokks Víet­nams varðveittur. Rétt hjá er Ho Chi Minh safnið og stultuhús Ho Chi Minhs, þar sem hann bjó frá 1958 til dauðadags 1969. Smágerð Einsúlu­pagóðan stendur í grenndinni; hún var fyrst reist 1049, Frakkar eyðilögðu hana 1954 en síðar var hún endur­reist. Bókmetnnta­hofið var reist 1070 og helgað Khong Tu (Konfúsíusi) og fræði­mönnum og skáldum. Árið 1076 var Quốc Tử Giám (þjóðar­háskólinn) stofnsettur í hofinu, fyrsti háskóli í Víetnam; þar þurftu menn að nema til að eiga kost á æðri embættum. Þá er haldið að undurfögru Vesturvatninu, og Tran Quoc búddapagóðan skoðuð.
Þá kynnum við okkur Bia Hoi bjórkrárnar sem njóta mikilla vinsælda. Að lokum sjáum við einstæða vatnsbrúðusýningu sem er ævintýralegt sjónarspil og snæðum síðan kvöld­verð í veitingahúsi í bænum.

Máltíðir: Morgunverður, kvöldverður.

Eftir morgunverð er ekið í þrjá og hálfan tíma um blómleg landbúnaðarhéruð óshólma Rauðár til Halong­flóa, sem er á heims­minjaskrá UNESCO. Þegar komið er til Halong um hádegi er farið um borð í júnku Athena Royal Cruise slík viðarskip hafa tíðkast á þessum slóðum frá fornu fari; í júnkunni er að finna öll nútíma þægindi. Síðan er siglt milli kalksteinsdranga á smaragðsgrænum Halongflóa. Á þilfari verður reiddur fram dýrindis sjávar­rétta­máls­verður. Eftir sólsetur er akkerum varpað fyrir nóttina við afskekkta eyju. Að loknum unaði kvöldins tekur við friðsæl nótt í einka­káetu.

Máltíðir: Morgunverður, hádegisverður, kvöldverður

Við njótum sólarupprásar við dögurðarborð. Á efra þilfari má slaka á og virða fyrir sér undurfagurt útsýnið þar sem klettaeyjar skaga upp úr skærgrænum haffletinum. Sigling heldur áfram og síðan er ekið á flugvöll og flogið til Ho Chi Minh borgar. Eftir komu þangað er haldið á hótel Aquari hotel  til þriggja nátta dvalar.

Máltíðir: Dögurður (brunch)

Ho Chi Minh borg er líka þekkt sem Saigon, hún iðar af lífi og er helsta viðskiptmiðstöð landsins. Eftir morgunverð er ekið 70 km í norðvestur til Cu Chi að skoða hin frægu jarð­göng sem eru meira en 200 km löng, en út frá þeim kvíslast fjöldinn allur af smærri göngum sem liggja að felustöðum, skýlum eða tengjast við önnur göng. Í ganganetinu er aragrúi af gildrum, sérútbúnum íveruskútum, birgðageymslum, vopnasmiðjum, sjúkra­skýlum, stjórnstöðvum og eldunarskútum. Nú á dögum hópast ferða­menn í göngin og þeim gefst kostur á að gera sér í hugarlund lifnaðar­hætti neðan­jarðar í US - Víetnam stríðinu. Hádegisverður í veitingahúsi. Síðdegis förum við í borgarferð um Saigon og skoðum m.a. Sameiningarhöllina, Vorfrúarkirkju og Gamla pósthúsið. Áhugamenn ættu ekki að láta magnað Stríðsminjasafnið fram hjá sér fara. Tilvalið er að skoða Thien Hau, eina helstu búddapagóðu borgarinnar, og versla á Binh Tay (Chinatown) eða Ben Thanh markaðnum, öðrum hvorum eða báðum, áður en ekið er til baka á hótelið.

Máltíðir: Morgunverður, hádegisverður

Í dag yfirgefum við borgarþysinn og könnum fagrar hrísekrur, vatnaleiðir og litskrúðuga markaði Mekong óshólm­anna. Eftir tveggja tíma akstur er komið til Ben Tre, og frá Hung bryggjunni siglum við á vélbáti út í umferðarysinn á ánni. Bátar eru á þönum og dorga eftir fiski eða flytja vörur á markað. Við komum við í múrsteinagerð að fyrri tíma hætti, siglum síðan til My Long þorps og fræðumst um hvernig hríspappír er búinn til og hrískökur bakaðar og snæddar. Farið með hestvagni eða rafbíl og siglt á árabát að hætti heimamanna eftir skurðum um kókos­hnetu­skóg, þar má sjá hvernig hneturnar eru nýttar. Komið er við á býflugnabúi, snæddir ávextir og sötrað hunangste undir söng og hljóðfæraslætti heimamanna. Þá fáum við heimagert sælgæti og kynnumst heimilisiðnaði í sveitinni. Málsverður er snæddur í veitingahúsi á árbakk­anum. Þá er siglt til baka til Hung og síðan ekið til Ho Chi Minh borgar á hótelið.

Máltíðir: Morgunverður, hádegisverður

Nú verðum við á eigin vegum, enginn víetnamskur leiðsögumaður vakir yfir okkur. Rúta flytur okkur frá gistihúsinu í Ho Chi Minh borg til annálaðs orlofsstaðar Phan Thiet/Mui Ne við S-Kínahaf. Allur aðbúnaður sem vera skal á góðum sumarleyfisstað Pandanus resort 4* Mui Ne. Eftir komu þangað búum við um okkur í hótelherbergi og gerum síðan það sem hugurinn girnist.

Máltíðir: Morgunverður

Áfram njótum við lífsins í þessari orlofsparadís sem vaxið hefur upp úr tveimur litlum fiskimannaþorpum. Heimamenn eru sérfræðingar í nuddi að austurlenskum hætti, einnig aðstæður til líkamsræktar, SPA til taks.

Máltíðir: Morgunverður

Enn skoðum við náttúruna, sólum okkur á ströndinni eða spjöllum við heimamenn um lífsins gagn og nauðsynjar.

Máltíðir: Morgunverður

Eftir morgunverð sækir rútan okkur á hótelið og skilar okkur á flugvöllinn við Ho Chi Minh borg, þar sem við tökum síðdegisflug til Siem Reap í Kambódíu. [Ekki þarf leyfisbréf fyrir vegabréfsáritun til Kambódíu. Hins vegar þarf hver ferðalangur að reiða fram við innflytjendaborð tvær ljósmyndir (35 x 45 mm) og 30 USD í reiðufé á mann]. Við komuútganginn í vinalegu flugstöðinni í Siem Reap tekur leiðsögumaður á móti okkur og fylgir okkur á hótel Somadevi Angkor 5*. Kvöldverður í veitingahúsi.

Máltíðir: Morgunverður, kvöldverður

Eftir morgunverð förum við í kynnisferð um heimsminjaborg UNESCO. Fyrst verður fyrir suðurhliðið að Angkor Thom, sem er forn konungsbúgarður 10 km2 að flatarmáli, miðstöð Khmer-veldisins með öllum nauð­synlegum innviðum, umlukinn múrum með árum og verndarverum. Miðdepill Angkor Thom er Bayon hofið, fjölturna bygging með lágmyndum úr goðafræði hindúa. Þá er komið að Fílasvölunum, þar sem haldnar voru stórfenglegar konunglegar sýningar á fagurlega skreyttum palli. Við hliðina eru Svalir Lepers konungs, sömuleiðis listilega skreyttar. Frá Angkor Thom er ekið um frumskóginn til Ta Prohm hoftóftanna. Ta Prohm musterið var reist fyrir níu öldum, en hvarf sjónum og var grafið upp á 19. öld. Það er einn helsti dýrgripur Angkor svæð­isins, ógnar­stórt, fagurt og tilkomu­mikið. Hofrústunum hefur ekki verið raskað síðan þær voru grafnar upp. Síðdegis höldum við að Angkor Wat, sem er mesta meistaraverk og höfuðprýði must­er­anna við Angkor. Musteris­byggingin þekur 0,8 km2 og er talin stærsta trúarbygging í heimi og óbrot­gjarn minnisvarði um sígilda myndlist og húsagerðarsnilld khmeranna. Áður en haldið er til baka til gistihúss njótum við sólarlagsins af Phnom Bakeng hæðinni. Um kvöldið verður snætt í einu fínasta veitingahúsi borgarinnar, þar fer fram Apsara danssýning.

Máltíðir: Morgunverður, kvöldverður

Eftir morgunverð er ekið um blómlegar sveitir til Rolous Group, sem er forn höfuðstaður Khmera­veldis­ins frá 9. öld. Síðdegis er haldið til Banteay Srei musteris (einnig nefnt Kvennahofið) sem glóir eldrautt í einfaldleik sínum og er það fágæt sjón. Þá er ekið til baka til Siem Reap og menn eru sjálfráðir gerða sinna það sem eftir er dagsins.

Máltíðir: Morgunverður, hádegisverður

Eftir morgunverð er ekið til flotþorps í Tonle Sap vatni, stærsta stöðu­vatni í suðaustur Asíu, sem er 10 km frá miðbænum. Þá er siglt í gegnum strandgróðurinn að nokkrum þorpum, bæði fljótandi og á stultum. Þar kynnumst við sérstæðum lifnaðarháttum. Vatnsborðið er 16 000 km2 þegar hæst er, þar er að finna fjölda fágætra dýra og vistkerfa. Máls­verður í veitingahúsi, förum á markað og skoðum síðan d’Angkor verkstæðin, þar sem efnilegum en fátækum kunnáttu­mönnum gefst kostur á að stunda forna iðju. Síðan er ekið á hótelið og við tekur frjáls tími.

Máltíðir: Morgunverður, hádegisverður.

Í dag er frjáls dagur, uns haldið er út á flugvöll til heimferðar með góðar minningar, minjagripi og gjafir til nánustu. Útskráning, skila lyklum og gera upp reikninga fyrir einkaneyslu oþh. kl. 12:00 í síðasta lagi, hægt að geyma farangur í afgreiðslu, hægt að gera loka innkaup og kaffihúsarölt, rúta út á flugvöll síðdegis.

Flug heim og ferðalok, lending í Keflavík e.h. að staðartíma á Íslandi.